Dashuria për trajnerët italianë po zgjerohet gjeografikisht në futbollin shqiptar dhe pavarësisht CV-ve jo shumë të pasura, po u besohen pankina nga më të rëndësishmet. I pari për nga rëndësia mbetet De Biazi, i cili vazhdon të drejtojë Kombëtaren dhe me të arriti një sukses historik, kualifikimin në fazën finale të europianit Francë 2016. Partizanin e ka drejtuar Agostineli, tashmë trajner i kampionëve të vendit, ndërsa klubi i kuq vazhdon të drejtohet nga një tjetër trajner Italian, Adolfo Sormani. Edhe ky i fundit e ka filluar aveturën e tij shqiptare me një sukses jo të vogël, pasi ndihmoi Partizanin në kualifikimin në turin e tretë eleminator të Champions League, duke eleminuar kampionët e hungarisë, Ferencvarosh. Ndërkohë që pas largimit të Maganit drejt Vlorës, Teuta ka prezantuar Çezare Bexhin, ish-trajner i të rinjve të Milanit, në Serinë B, por edhe tek NK Gorica në kampionatin slloven. Edhe për Bexhin, sfida e tij do të jetë kryesisht me Agostinelin dhe Sormanin, për t’i ndihmuar durrsakët të paktën të përsërisin suksesin e sezonit të shkuar, kur fituan të drejtën për t’u ndeshur në Europa League. Në krye të “djemve të detit”, në sezonin 2013-2014 ka qenë një italian tjetër, Roberto Sorentino, por që qëndroi vetëm 4 muaj, ndërsa Bexhi ka nënshkruar një kontratë 1-vjeçare me opsion rinovimi dhe pritet të paguhet rreth 70 mijë euro në vit.
