Historiani në protestën e shoqatës “Çamëria” që u zhvillua para Ministrisë së Jashme, ku u krye takimi i ministrit Bushati me ministrin e Jashtëm grek
Më i vjetri ndër çamët, historiani, Ibrahim Hoxha, ishte në protestën e sotme të shoqatës “Çamëria”, para Ministrisë së Jashtëme, atje ku u takuan ministri Ditmir Bushati dhe ai grek Nikos Kotzias. Ibrahim Hoxha, dëshmoi se ka qënë partizan në batalionin “Ali Demi” gjatë Luftës së Dytë Botërore, duke theksuar se kjo është një dëshmi kundër versionit të grekëve që duan t’i servirin çamët si kolaboracionistë.
“Sot jemi mbledhur për të kërkuar atdheun tonë, vatrat tona, të cilat na janë rrëmbyer. Kemi ardhur këtu që t’i kujtojmë ministrit të Jashtëm shqiptar që sot t’i thotë Greqisë se nuk nuk jemi të mosqënë, ashtu siç na quajti ministri grek, por jemi gjallë dhe plot fuqi për të mbrojtur të drejtat tona. Jemi ata që shpëtuam nga dhuna greke dhe jemi në Shqipëri si mysafirë në shtëpinë e vëllait, pra në Shqipëri. Vatrat tona janë në Greqi. Qysh në vitin 1941 nuk kam shkuar në vatrën timë”, tha historiani Hoxha, në protestën e shoqatës “Çamëria”.
