Shoqata Çamëria, Fondacioni Çamëria dhe PDIU, kanë ndërmarë nismën “Çamëria nuk harron” për t’ju ardhur në ndihmë familjeve në nevojë në këtë situatë që po kalon vendi për shkak të pandemisë Covid-19. Kreu i PDIU-së Shpetim Idrizi deklaroi për “Gazeta shqiptare” se iniciativa ka nisur fillimisht në Tiranë por nga e hëna do të shpërndahen ndihma edhe në Durrës, Fier, Vlorë, Lushnjë, Elbasan, Sarandë etj.
“Ne nuk harrojmë ndihmën e popullit shqiptar për të parët tanë, e as njerëzit në nevojë sot në këtë kohë të vështirë nga Pandemia Covid-19 . Në këto momente të vështira që po kalojmë, të gjithë solidariteti, humanizmi, mbështetja me gjithçka mundemi për të moshuarit e për çdo familje në varfëri, është thirrja jonë për çdo shqiptar qe ka mundësi të kontribojë. E nisëm si domosdoshmëri për tu afruar ndihmë të moshuarve Çam por shumë shpejt e shtrimë nismën “Çamëria nuk harron” tek çdo shqiptar në nevojë”-shprehet zoti Idrizi.
Deri tani janë shperndarë 1500 pako për familjet në nevojë teksa Idrizi siguroi se do të vazhdojmë çdo dite deri në fund të periudhës së vështirë.
