Ambasadori i SHBA-së, Donald Lu dhe ambasadorja e BE-së, Romana Vlahutin u takuan sot në selinë e Partisë Demokratike, me kryetarin kësaj partie, Lulzim Basha. Në takim mendohet se është diskutuar për ngritjen e Byrosë Kombëtare të Hetimit dhe reformën në drejtësi.
Partia Demokratike ka deklaruar gatishmërinë për të votuar sa më shpejt në parlament Byronë Kombëtare të Hetimit, por ndërkohë pritet që të vijnë rekomandime nga Komisioni i Venecias për këtë çështje. Gjithë debati është përqëndruar në pikën për varësinë e këtij institucioni. Mazhoranca kërkon që Byroja e Hetimit të varet nga qeveria ndërsa opozita kërkon që ky institucion të varet nga Prokurori i Përgjithshëm.
Ndërkombëtarët janë në një tjetër qëndrim që ky institucion me rëndësi parësore, luftën kundër korrupsionit në nivelet e larta të politikës dhe qeverisjes, të jetë i pavarur. Këtë deklaruan një ditë më parë dy europarlamentarët Eduard Kukan dhe bKnut Fleckenstein.
