Ministria e Financave: 830 milionë lekë për dëmshpërblimin e të burgosurve që rezultojnë të pafajshëm për vitin 2016
Burgosja e padrejtë e personave kthehet në kosto për financat e shtetit. Janë qindra raste të personave të dënuar me burg, por që më vonë rezultojnë të pafajshëm dhe në këtë rast shteti është i detyruar t’i dëmshpërbleje. Ministria e Financave ka publikuar se janë 690 vendime të padrejta për të cilat do të duhet të dëmshpërblehen qytetarët e burgosur padrejtësisht. Për vitin 2016 është përcaktuar një fond prej 830 milionë lekë. Kompensimi i burgimit të padrejtë rregullohet nga dispozitat e Ligjit nr. 9381, dt. 28.04.2005 “Për kompensimin e burgimit të padrejtë”.
Ky ligj parashikon që duhet të kompensohen për burgimin e padrejtë, ose periudhën e arrestit në shtëpi, të vuajtur padrejtësisht, personat për të cilët prokuroria ka pushuar hetimet, personat për të cilët gjykata ka dhënë pafajësinë dhe ata për të cilët është vendosur pushimi i çështjes. Përfitojnë gjithashtu kompensim personat, që kanë vuajtur një dënim për një periudhë më të gjatë sesa ajo e parashikuar në vendimin gjyqësor, apo se sa afatet e parashikuara nga Kodi i Procedurës Penale, në lidhje me afatet e paraburgimit.
E drejta për kompensim iu njihet edhe personave, për të cilët vendimi i dënimit, mbi bazën e të cilit iu është hequr liria është prishur nga një gjykatë e një shkalle më të lartë, ose nëse vërtetohet, që vendimi për heqjen e lirisë është marrë si rrjedhojë e një procedure të gabuar. Ligji ka parashikuar shprehimisht që, detyrimi për kompensimin e burgimit të padrejtë përballohet nga Ministria e Financave, e cila duhet të thirret si palë në procesin gjyqësor, me anë të të cilit përcaktohet masa e kompensimit.
