Britania e Madhe do të zbatojë sanksione të reja më të ashpra ndaj Rusisë. Ministria e Ekonomisë bëri të ditur me deklaratë për shtyp se do të ndalohen që bizneset britanike të kryejnë transaksione nga Banka Qendrore e Rusisë dhe Fondi Kombëtar i Pasurisë së këtij vendi.
Në këtë mënyrë, Banka Qendrore e Rusisë nuk do të jetë në gjendje të kryejë transaksione të huaja financiare për të mbështetur monedhën e saj rubla.
“Paketa jonë e sanksioneve me masat më të ashpra që Britania e Madhe ka ndërmarrë ndonjëherë ndaj Rusisë do të shkaktojnë pasoja shkatërrimtare ndaj presidentit rus Vladimir Putin dhe vendit që drejton”, bëhet me dije në njoftimin e Ministrisë së Financave.
Pas nisjes së luftës në Ukrianë, Britania e Madhe vendosi që të bllokojë 5 banka dhe 3 biznesmenë rusë. Ndërkohë, SHBA, BE, Britani e Madhe dhe Kanada pranuan që të përjashtojnë bankat ruse nga sistemi financiar SWIFT.
