Kryeministri i Mbretërisë së Bashkuar njoftoi se do të vaksinohet me Astra Zeneca shumë shpejt.
Johnson tha se kjo është gjëja më e mirë që mund të bëjë, duke ju përgjigjur kështu pyetjes së deputetit të partisë konservatore, Steve Brine, në pretendimin e tij për dezinformimin dhe braktisjen e dukshme të provave shkencore në disa vende anëtare të BE, lidhur me AstraZeneca.
Kryeministri britanik tha se vaksinimi i tij është lajmi më i mirë që mund të japë në lidhje me programin e vaksinave Oxford AstraZeneca.
“Unë mendoj se ndoshta gjëja më e mirë që mund të them në lidhje me programin e vaksinave Oxford / AstraZeneca është se më në fund mora lajme se do të bëj timen shumë shpejt, jam i kënaqur ta zbuloj këtë”, ka thënë Johnson.
Lajmi për vaksinimin e Johnson vjen pas një sërë anullimesh të vaksinës AstraZeneca në shumë shtete të Europës, ndërkohë rregullatorët e ilaçeve të Organizatës Botërore të Shëndetësisë këmbëngulin se kjo vaksinë është më se e sigurt dhe se ka aftësinë e plotë të veprojë kundër koronavirusit.
Në lidhje me pretendimet se AstraZeneca shkakton mpiksje gjaku, ka reaguar dhe sekretari i shëndetësisë në Mbretërinë e Bashkuar, Matt Hancock i cili ka hedhur poshtë këto pretendime duke shtuar se nuk ka asnjë provë në lidhje me këtë.
Kryeministri britanik u infektua nga koronavirusi prillin e kaluar dhe qëndroi në kujdes intensiv
