“Nuk më përzunë socialistët, por njerëzit e Berishës. PS është kthyer në pronë e një individi të vetëm”
“Miku i paftuar e gjen pashtruar”, thotë një fjalë popullore. Kështu i ka ngjarë sot deputetit socialist Ben Blushi në Elbasan, atje ku kryetari i PS-së Edi Rama po zhvillonte aktivitetin e radhës me elektoratin socialist. Një grup militantësh të PS-së në Elbasan kanë përzënë nga aktiviteti deputetin Ben Blushi, i cili u afrua të salla ku Rama po zhvillonte aktivitetin.
Në momentin që ka tentuar të hyjë në sallën ku po fliste Rama, Blushi është fishkëllyer dhe mes thirrjeve të militantëve është përzënë nga salla. Për këtë pjesë të elektoratit që e përjashtoi, Blushi tha se nuk janë socialistë, por njerëz që kanë fishkëllyer pro Berishës me qindra herë.
Ben Blushi është deputet i Elbasanit dhe kryesues i listës së PS-së për këtë qark. Prej disa muajsh është pozicionuar kundër kryetarit Rama për mënyrën se si po e drejton partinë, por edhe qeverinë. Blushi ka paraqitur pak ditë më parë një platformë politike për ndryshimet në statutin e Partisë Socilaiste, e kundërt me atë që ka miratuar grupi i punës për ndryshimet në statutin e PS-së.
