Gledion Rehovica, është deputeti i LSI-së që mban numrin 71, bazuar në klasifikimin e deputetëve sipas alfabetit. Por ka pak gjasë që ai të mbajë sot numrin 71, si më i kërkuari nga dy palët, ata që duan qeveri teknike e artikuluar si mundësi nga Ilir Meta apo ata që kërkojnë vazhdimin e qeverisë të mbështetur nga kryeministri Rama. Padyshim është shumë intensive ajo çfarë po ndodh underground sot në politikën shqiptare. Duhen vetëm dy ditë për të mbërritur në momentin e së vërtetës, atë të votës për reformën në drejtësi. Pikërisht qëndrimet për votën ndaj kësaj reforme kanë sjellë pështjellim të madh në radhët e mazhorancës, pasi opozita ka kohë që është deklaruar kundër kësaj reforme. Lëvizja Socialiste për Integrim e drejtuar nga Ilir Meta, është shprehur qartë dhe prerë se pa konsensusin e opozitës nuk mund të ketë votë pro reformës në drejtësi. Kjo do të thotë që 20 votat e LSI-së nuk janë pro reformës, për të cilën Rama duket i vendosur ta votojë ashtu siç është, pa asnjë ndryshim në nenin për vetingun. Ndërkombëtarët gjithashtu janë pro këtij drafti dhe kundër opozitës që kërkon të përjashtojë ndërkombëtarët nga roli i tyre në procesin e vetingut.
Shumica praktikisht është prishur, pasi Ilir Meta e ka shpallur publikisht qëndrimin e tij shumë të larguar nga ai i aletatit Edi Rama. Ilir Meta ka deklaruar: Ose të votohet reforma në drejtësi me konsensusin e opozitës ose të shkohet në qeveri teknike dhe më pas në zgjedhje të parakohshme. Është tashmë e qartë se opozita nuk do ta pranojë reformën siç është duke qartësuar kështu edhe qëndrimin e LSI-së që pritet të jetë një votë kundër kësaj reforme.
Burime thonë se ka disa ditë që Meta ka nisur përpjekjet për të siguruar deputetë që i garantojnë këtë zgjidhje dhe kjo ndodh në bashkëpunim me opozitën e drejtuar nga Basha, (i orientuar nga Berisha).
Nga ana tjetër Edi Rama nuk ka pushuar negociatat me deputetët e tij, por edhe jashtë gardhit të PS. Përmes kanaleve të ndryshme të komunikimit, Rama ka kërkuar mbështetje edhe nga deputetë të tjerë. Duket se ai favorizohet prej faktit se brenda së djathtës janë të paktën 10 deputetë që nuk do të votojnë kurrë një marrëveshje të PD-së me Ilir Metën. Ka pasur disa momente në këto dy ditë, kur votat pro Ramës e pro Metës janë barazuar. Beteja për numrin 71, deputeti që do të bënte diferencën vazhdon.
