Ish-kryeministri Sali Berisha ka kërkuar bashkëpunimin e të gjitha forcave politike, për krijimin e një qeverie tenkike, pasi sipas tij me Ramën në krye nuk mund të ketë zgjedhje të lira.
I pranishëm në çadrën ku ndodhen protestuesit Berisha paralajmëroi se opozita do të nisë mosbindjen civile nëse kryeministri Edi Rama nuk pranon kushtin për qeveri teknike.
Më tej ai tha se nëse Rama nuk pranon qeverinë teknike , PD-ja do ia imponojë që ta pranojë me një këmbë.
Gjithashtu Berisha tha se përveç vitit ’91 nuk ka patur kurrë protestë 4 muaj para zgjedhjeve.
“S’ka pasur kurrë protestë 4 muaj para zgjedhjeve. Kjo protestë është këmbana më e fuqishme e alarmit për çdo shqiptar. 4 muaj para zgjedhje nuk proteston kurrë një forcë nëse nuk e konsideron jetike protestën. Ishin gjysmë milionë shqiptar që erdhën në këtë mision dje. Janë në mision të madh. Pra, të gjithë atyre që analizojnë këtë protestë, ju them, të mos harrojnë se shpërtheu katër muaj para zgjedhjeve çka s’ka ndodhur kurrë që nga viti ’91 e deri sot”, tha Berisha
Ndërkaq ish-Kryeministri u ka bërë thirrje edhe qytetarë shqiptarë që janë jashtë vendit të ngrihen në protestë para Ambasadave Shqiptare, sipas tij kundër regjimit të banditokracisë .
“Thirrja ime për emigracionin dhe diasporën është të marrin të gjitha masat që të organizojnë protesta pranë selive të qeverive ku janë, pranë Ambasadave të Shqipërisë, kundër regjimit të banditokracisë”, u shpreh Berisha.
