Ditën e sotme Komisioni i Rithemelimit po zhvillon zgjedhje për kryetarin e degës 2 në Tiranë, ku për të votuar është paraqitur edhe ish-kryeministri, Sali Berisha. Në prononcimin për mediat që pati, Berisha i është përgjigjur edhe ambasadores amerikane, Yuri Kim, ku tha se deklaratat e saj kanë pasur shkelje të rëndë mbi vlerat dhe liritë. Berisha gjithashtu tha se për këtë do të informojë edhe SHBA-të.
“Është pak më komplekse, sidoqoftë ky revolucion nuk ndalet nga asgjë. Nuk besoj se ka pasur një shkelje më të rëndë mbi vlerat e vendeve të lira. Nuk besoj se është orientim dhe parim i vendit, është akt individual. Do informojmë SHBA” – tha Berisha.
Kujtojmë se ditën e djeshme, ambasadorja e SHBA-së ka reaguar menjëherë pas deklaratave të ish-kryeministrit Sali Berisha se ajo po ndërhyn në sistemin e drejtësisë, duke iu bërë presion gjykatësve dhe prokurorëve. Kim hodhi poshtë akuzat për presion, por shprehet se ajo ka inkurajuar gjyqtarët të bëjnë punën pavarësisht kërcënimeve, ndërsa shton se SHBA do të vazhdojë të mbështesë reformën në Drejtësi.
“Nëse “ndërhyrja në procesin gjyqësor” nënkupton inkurajimin e gjyqtarëve dhe prokurorëve që të bëjnë punën e tyre pavarësisht kërcënimeve apo nxitjeve, duke e bërë të qartë, SHBA do të vazhdojë të mbështesë zbatimin e reformës në drejtësi në Shqipëri, duke nënvizuar se askush nuk është mbi ligjin, dhe duke kërkuar që të gjithë ne duhet të bëjmë pjesën tonë për të luftuar kundër korrupsionit dhe mosndëshkimit, atëherë PO, SHBA e ka bërë dhe do të vazhdojë ta bëjë pikërisht këtë – sepse lufta kundër korrupsionit dhe përpjekjet për të minuar demokracinë përbëjnë një interes thelbësor të sigurisë kombëtare të SHBA-së” – shprehet Kim.
