Në ditën e fundit të Konventës Kombëtare të demokratëve, ku Hillary Clinton pranoi nominimin si kandidate për Presidente të SHBA-ve, kryetari i Partisë Demokratike, Lulzim Basha u takua me senatorë dhe kongresmenë, mes të cilëve edhe me bashkëkryetarin e Komitetit për Europën, Eliot Engel.
Ndër të tjera, Engel ka vlerësuar kontributin e rëndësishëm të zotit Basha dhe forcës politike që ai udhëheq, PD, për Reformën në Drejtësi. Engel e përgëzoi zotin Basha për udhëheqësinë e treguar për sjellen e një reforme të bazuar në standardet më të mira të rekomanduara edhe nga Komisioni i Venecias, si dhe për miratimin me konsensus të saj.
“Konsensusi ishte e vetmja mënyrë për të garantuar një drejtësi të pandikuar politikisht”, theksoi Engel, duke përgëzuar zotin Basha për qëndrimin e tij parimor. Kryetari i Partisë Demokratike, nga ana e tij shprehu mirënjohjen për mbështetjen e madhe që SHBA-të i kanë dhënë Shqipërisë në këtë proces, i cili ishte kompleks dhe i vështirë, por në fund të të cilit, produkti është ai nga i cili përfiton çdo qytetar.
Pas Dekriminalizimit dhe Reformës në Drejtësi, zoti Basha ka theksuar se zgjedhjet e lira dhe të ndershme janë sfida e ardhshme për Shqipërinë. Për këtë, Basha kërkoi ndihmën dhe mbështetjen e Engelit dhe të Komitetit për Europën në Kongresin amerikan.
Engel, ndërsa theksoi se një vend nuk mund të bëjë progres nëse nuk garanton votën e lirë të qytetarëve të tij, ka ofruar mbështetjen dhe gatishmërinë për të kontribuar në të gjithë procesin që do të sjellë një proces zgjedhor të lirë dhe të ndershëm në Shqipëri.
