“Në 3 vetë, dy i ka kriminelë, trafik droge, rrëmbim personi, prostitucion dhe vrasje. I treti është hajdut i uritur”
Kryetari i opozitës Lulzim Basha reagoi pasi Rama kishte shkruar një mesazh për aksionin me vezë të PD-së në parlament. Rama e quajti kulmin e trishtimit të PD-së aksionine sotëm ndërsa Basha i është përgjigjur me akuzën: “Edi Rama, në 3 vetë, dy i ka kriminelë, sipas fushës ku kanë gjakuar, trafik droge, rrëmbim personi, prostitucion dhe vrasje. I treti është hajdut i uritur, por ama aq sa të mos ngopet shpejt, të zgrape çdo ditë për Ramën së pari, e çtë mbetet për veten e tij”.
Kryetari i PD-së e sulmoi Ramën për ministrat e tij Arben Ahmetaj e Ilir Beqaj të cilët janë akuzuar më së shumti nga opozita. Basha përsëriti akuzën ndaj Ramës edhe për kriminalizimin e parlamentit referuar rastit të Armando Prengës.
“Nëse ka një fund të palavdishëm të fantazisë dhe krijimtarisë është të bësh ministër Ahmetajn e Beqen, të cilët kanë damkën e hajdutit që dallohet me kilometra larg. Fund i shëmtuar i kreativitetit, të bësh deputet Armando Prengën. Më keq, ta marrësh në mbrojtje në të gjitha herët kur ky lac me kobure në xhep, tregon veten.
Edhe sot këtë bëri. E mori në mbrojtje edhe pse mbarë opinioni janë të tronditur, dhe Brukseli në alarm.
Thuhet se realiteti lë pas çdo fantazi. Realiteti që na solli Edi Rama këtë ka bërë. Ndaj habitet ambasadori pse Shullazi është i lirë. Pse Frroku arratiset me kollajllëk.
Në habi janë kapur i madh e i vogel se si një kryeministër i kapur në shtrat me krimin, vazhdon ta riprodhoje atë, duke shtuar banditët kudo. E duke i mbrojtur ata deri në fund. Aq sa sot nuk dallon dot një ndryshim mes një strukture kriminale dhe qeverisë Rama. Një enë e bashkuar që merr e jep gjithë ditën.
Partia Demokratike është sot e vetmja pengesë për Edi Ramën që ta shndrrojë tërë vendin në Republikë të trafikantëve, gangsterëve, vrasësve.
Ai do të donte që të kishte Armando Prenga, në vend të qytetarëve. Ai do donte të kishte Armando Prenga në vend të opozitës. Ai do donte të ishte Armando Prenga në vend të ndërkombetarëve. Por projekti i tij është ndërprerë.
Është në fundin e tij dhe zhgërryhet edhe ca kohë me krimin. Demokratet, qytetarët, socialistët e ndershëm, të majtë e të djathtë do ta heqin këtë ciban. Duke u majmur e ngrefur, thjesht po afron theqafjen e tij”.
