“Interesi ynë të kemi një kompromis jopartizan për drejtësinë”
Kryetari i Partisë Demokratike, Lulzim Basha u shpreh i gatshëm për negociata me pozitën mbi rekomandimet e Komisionit të Venecias. Në një intervistë të drejtpërdrejtë në studiot e Zërit të Amerikës, Basha foli për propozimet e PD për zhvillimet në Shqipëri si dhe takimet me zyrtarët amerikanë në Uashington. Duke folur për qëndrimet e opozitës për zhvillimet më të fundit në vend Basha është shprehur: “Kur vjen puna tek çështje të tilla të shtetndërtimit si reforma në drejtësi, zbatimi i ligjit të dekriminalizimit apo reforma zgjedhore, ajo që lypset është që palët politike të bashkëpunojnë për të implementuar standardet dhe normat europiane dhe euro-atlantike, jo standarde sui generis, jo standarde Rama as standarte Basha. Jo standarte alla Tirana, por standarde europiane, euroatlantike, të Uashingtonit dhe të Brukselit. Në takimin me zonjën Nulland këtë kam theksuar: faktet tregojnë që Partia Demokratike nën drejtimin tim, jo vetëm nuk ka refuzuar, por ka shtrirë dorën e bashkëpunimit, a thua se jemi ne tashmë në qeveri dhe pala tjetër në opozitë. Kjo është refuzuar deri në ditën e sotme”. Ndërsa I pyetur për reformën në drejtësi Bash aka thënë “Rekomandimet e Venecias janë baza mbi të cilën ne jemi gati të punojmë. Interesi ynë nuk është të kemi një kompromis bipartizan për drejtësinë, por një kompromis jopartizan për drejtësinë. Sepse një drejtësi e politizuar, e polarizuar më tej nuk do të jetë në gjendje t’i shërbejë mirë qytetarit”. Për Byronë Kombëtare të Hetimit kreu demokrat ka ofruar dy variante. Sipas tij “Byroja Kombëtare e Hetimeve nuk mund të jetë kurrë në vartësinë e asnjë institucioni përveç institucionit të cilit Kushtetuta i beson hetimin, që është Prokuroria Shqiptare. Ka dy mënyra për ta bërë këtë, me ndryshime kushtetuese që do të thotë ngritja e një organizate të re me kompencë të veçantë për luftën kundër korrupsionit, dhe së dyti, varianti tjetër është që të futet nën varësinë e Prokurorit të Përgjithshëm, për të cilin nuk ka nevojë për ndryshime kushtetuese”. Basha tha se forca që drejton është plotësisht e hapur për hetime në kuadër të luftës kundër korrupsionit. “Qëndrimi im si kryetar i Partisë Demokratike ka qenë dhe është i qartë kristal. Ne jemi të japur dhe mbështesim çdo hetim të pavarur, profesional, të çdo akuze për korrupsion ndër zyrtarët tanë aktualë, apo ish-zyrtarët tanë duke filluar nga unë i pari”. Kreu i PD, Lulzim Basha pati ditët e fundit një viztë në SHBA, ku zhvilloi takime me zyrtarë të administrates amerikane, me zonjën Nulland, Ndihmës Sekretare e Shtetit dhe me zyrtarë në Shtëpinë e Bardhë për Sigurinë Kombëtare.
