Kreu i Partisë Demokratike, Lulzim Basha ka zhvilluar sot takime me banorë të Kamzës dhe të Paskuqanit, ku ka dëgjuar nga afër shqetësimet e tyre. Banorët ankoheshin për terrorin e tatimeve ndaj biznesit, gjobat e larta dhe heqjen e ndihmës ekonomike për familjet në nevojë dhe personat me aftësi të kufizuar.
Basha theksoi se investimet në infrastrukturë që hapin vende pune do të jenë prioritet i qeverisë së drejtuar prej tij. Ai u ndal dhe tek diskriminimi që qeveria u bën bashkive të fituara nga të djathtit ku pasojat bien direkt tek qytetarët. Sipas Bashës, kjo teknikë duhet të marrrë fund dhe se investimet e e qeverisë do shkojnë kudo ku kanë nevojë qytetarët, pasi një qeveri votohet për t’ju shërbyer të gjithëve pa dallime politike.
Basha: “Lekët e doganave i fusin në xhepat e tyre dhe pastaj për të kompensuar këtë vjedhje që i bëjnë qytetarëve shkurtojnë ndihmën ekonomike, shkurtojnë investimet, nuk rrisin rrogat, nuk rrisin pensionet, rrisin çmimin e energjisë. E gjithë barra e korrupsionit bie mbi shpatullat e qytetarëve dhe më shumë mbi shpatullat e qytetarëve të pamundur. Papunësia e lartë ka sjellë rënie të fuqisë blerëse. Kjo ndihet tek dyqanet ushqimore, ku ushqimet jetike merren me listë.”
Kreu demokrat gjatë një vizite në një biznes fason kërkoi nga sipërmarrësit rritjen e pagave. “Ju e dini platformën tonë që do ta çojmë 9% tatimin, 0 dividentin. E vetmja kërkesë është që një pjesë e kësaj të transferohet punonjësve në rritje rroge.”-tha kreu i Partisë Demokratike.
Ndëkohë kreu i Bashkisë së Kamzës, Xhelal Mziu tha se i kishte dërguar 96 projekte qeverisë dhe nuk ishte marrë asnjë fond. “Pra, një persekutim total po i bëhet kësaj bashkie”, u shpreh ai.
