Garantimi i zgjedhjeve të lira dhe të ndershme, sistemi zgjedhor dhe platforma opozita ishin tre çështjet kryesore që kreu i PD-së, Lulzim Basha, diskutoi me aleatët e tij. Sipas Bashës çështja më parësore është garantimi i zgjedhjeve të lira dhe të ndershme, si e vetmja mënyrë për ta nxjerrë vendin nga kriza.
Pas takimit me aleatët, Basha tha se bashkë me aleatët është rënë dakrod për konsolidimin e qëndrimeve për çështjet kryesore.
“Zgjedhjet po afrojnë, mundësia e qytetarëve për tu shprehur me votë për keqqeverisjen janë zgjedhjet e lira dhe të ndershme. Këto zgjedhje janë edhe mundësia për të nxjerrë vendin nga kriza.
Platforma opozita, strategjia jonë që po rakordohet me aleatët tanë parshikon garantimin e votës së lirë, garantimin e numërimit të votës, për këto të dyja ka një sërë opsionesh ku nuk përjashtohet mundësia për votimin elektronik.
Çështja e financimit të partive, që do të thotë kriminalizimi i donacioneve private, financim i drejtpërdrejtë nga buxheti i shtetit në propozimin e PD, por jemi të hapur të diskutojmë cdo alternativë tjetër që pamundëson miliardat e korrupsionit qeveritar të derdhen me lugë kafeje për të blerë votën për të ushtruar presion mbi votuesin dhe padyshim zbatimi i dekriminalizimit dhe garantimi i lirisë së medias. Këto janë 5 shtyllat tona.
Çështja e dytë ka të bëjë me sistemin, ku partitë kanë diskutuar me një frymë të hapur që garantojnë përfaqësimin e qytetarëve shqiptare. Për ti dhënë fund këtij hendeku të madh.
Dhe së treti kemi diskutuar për çështjen e platformës opozitare, propozimin tonë për ti dhënë shqiptarëve një ekonomi që prodhon, punëson dhe pasuron shqiptarët dhe jo një ekonomi të dobët për hir të një grushti oligarkësh që rrëmbejnë miliardat e buxhetit të shtetit”, tha Basha. Në takim me kryetarine PD-së ishin të pranishëm kryetari PR-së, Fatmir Mediu, i LZHK, Dashamir Shehi, Agron Duka, kryetar i Partisë Agrare.
