Kreu i Partisë Demokratike, Lulzim Basha ka thënë se ka vetëm 1 Parti Demokratike dhe vetëm 1 Kuvend Kombëtar të thërritur nga institucionet e saj e që do të jetë të shtunën e 18 dhjetorit.
Ai ka deklaruar se bravat në zyrën e kryetarit të FRPD janë thyer nga personat që erdhën me ish-kryeministrin Sali Berisha. Basha ka theksuar se demokratët do të zgjedhin të ardhmen, të çlirohen nga dualizmi dhe të ndërtojnë të ardhmen e vendit.
“Dyert i kanë thyer ata që erdhën me zotin Berisha, e më pas janë riparuar. Janë thyer dyert sepse sipas tyre janë ndërruar bravat. Në këtë moment rolet përcaktohen nga qëndrimet, kush është gojëkyçur e të hapë çështje të tjera. Kemi 1 orë e 35 min që flasim për aferën më të madhe korruptive të këtyre viteve të fundit. Pyetja që vjen është kush e theu bravën?! Ka kohë, kur të dëshironi ju, jo sot, nuk është në nderin e asnjë televizioni. Sa për 18 dhjetorin ka 1 PD, ka një Kuvend kombëtar të thërritur nga institucionet e partisë, ka 1 statut, PD do të ikë drejt të ardhmes sepse s’ka rrugë tjetër. Nuk ka demokrat që merr përsipër këtë barrë të dyfishtë.
Më 18 dhjetor, do të jeni të pranishëm në kushte transparence krejt ndryshe nga çdo orvatje të organizimit që bëhet për halle personale, se si demokratët mblidhen dhe zgjedhin të ardhmen. Të çliruar nga dualizmi, e të vetëdijshëm për të mos përsëritur më gabimet e së shkuarës që i kanë kushtuar shqiptarëve dhe demokracisë. Ne do të zgjedhim të ardhmen, ky është parakusht për të ecur me shqiptarët drejt rrugës së zhvillimit. Nuk ka fuqi në Shqipëri veç PD që ta bëj këtë ndryshim realitet. Nuk kemi rrugë tjetër, veçse të zgjedhim të ardhmen e të lemë pas të shkuarën. Kjo do bëhet me sakrificën e shqiptarëve dhe në respektin maksimal të sakrificës së demokratëve që nuk do të shndërrohen mish për top për interesa personale të askujt”, tha Basha.
