Kryetari i partisë Demokratike Luzim Basha i është bashkuar sërsisht protestuesve që ndodhen në çadrën e ngritur në bulevardin “Dëshmorët e Kombit”. Krye demokrati u largua nga protesta në orën 6 të mëngjesit pasi kishte qëndruar gjithë natën me protestuesit, për tu rikthyer sërisht në orën 10 e 20 të ditës së sotme. Sapo ka hyrë në mesin e protestuesve Basha tha se ky është Parlamenti dhe Parlamenti jeni ju.
Më poshtë po rendisim disa zëra të opozitës se çfarë kanë deklaruar ata në media për këtë protestë.
Deputeti i PD Genc Pollo u shpreh: “Zgjidhja politike që kërkojnë këta njerëz përmes një qëndrimi afatgjatë nuk ka të bëjë me favorin e një partie, por me diçka që Shqipëria nuk e ka arritur 100% dhe është cilësia e zgjedhjeve. Zgjedhjet janë në rrezik, dhe prandaj këta njerëz janë sot këtu. Pengesa që Rama i bën dekriminalizmit është një arsye që i mbledh njerëzit. Nuk është se rrimë këtu për të ndenjur, por rrugët ligjore kanë dështuar, sepse Rama nuk do të japë garanci për zgjedhjet normale”.
Ndërsa deputeti Luçiano Boçi tha se zgjedhjet mund të shtyhen edhe në vjeshtë. Gjithashtu deputeti i PD, Gerti Bogdani tha nga çadra e ngritur në shesh se dy janë kërkesat, qeveri teknike dhe reformë zgjedhore, për të garantuar zgjedhje të lira dhe të ndershme.
