Kryetari i PD-së, Lulzim Basha ka thënë në grupin parlamentar të PD-së se ende nuk ka kthyer një përgjigje përfundimtare për propozimin e zyrtares së lartë amerikane, Nuland për reformën në drejtësi. Burime nga grupi parlamentar i PD-së, thanë se Basha ka sqaruar deputetët se ato çfarë janë shkruar në media janë abuzime. Basha ka theksuar se po punohet për të gjetur një zgjidhje, ndërkohë që ka qartësuar sërish se nuk mund të pranohet rol vendimarrës i ndërkombëtarëve në procesin e Vetingut.
Burimet thonë se Basha është përpjekur të sqarojë deputetët e tij, tashmë mjaft skeptikë për qëndrimet e partisë ku bëjnë pjesë për reformën në drejtësi. Deputetët e PD-së duket se nuk do të vazhdojnë të jenë të bindur qorrazi ndaj kryetarit për të mos e votuar reformën në drejtësi, pasi tashmë nuk ka më asnjë alibi që e justifikon votën kundër kësaj reforme. Kjo është edhe arsyeja e debatit që ka nisur mes deputetëve dhe kryetarit Basha ne grupin parlamentar.
