Banorët e Fterrës, fshat në Vlorë, kanë gjetur një mënyrë mjaft të këndshme për të ndarë kohë me njëri-tjetrin, për të biseduar për problemet që i shqetësojnë, por edhe për të festuar së bashku festa të ndryshme. Ata kanë krijuar “Parlamentin e Fterrës”që mblidhet çdo të shtunë, zgjat dy orë dhe anëtarë janë vetë banorët e Fterrës.
“Ne kemi atë që e kemi emërtuar “Parlamenti i Fterrës”, sepse aty mblidhemi të gjtihë dhe për faktin se disa nga ato rregulla që përdorim ne atje, janë si në parlament” – thotë Feksor Shkurti, banor i Fterrës.
“Të jesh anëtar i Parlamentit të Fterrës është kusht që të jesh nga Fterra. Nëse nuk je nga Fterra do të jesh i ftuar nderi ose mik i fterriotëve, por jo anëtar parlamenti” – shton Shkurti, anetar i parlamentit.
Njëri prej anëtarëve të këtij “parlamenti” thekson se një nga rregullat bazë është që të mos shash ose të ofendosh njeri.
Bashkëshortja e Feksorit shprehet se mbledhja e “parlamentit” tani është bërë e zakonshme çdo të shtunë dhe shpesh herë anëtarët prishin dhe planet e tyre familjare për të qenë pjesë e mbledhjes që zgjat rreth dy orë.
Anëtarët e “parlamentit” festojnë rastet e festave së bashku dhe sidomos ditëlindjet e njëri-tjetrit.
