Ish-deputeti demokrat Klevis Balliu ka folur sot gjatë një interviste televizive për situatën në të cilën ndodhet Partia Demokratike. Ai u shpreh i keqardhur se opozita arriti në atë pikë që, zgjidhjen se kush është shumica në PD ta jepte gjykata. Sipas tij nuk mund të quhej opozitë grupi i Bashës që në vend të përpiqej për të larguar Ramën, i vihej kundër Berishës. Pavarësisht këtyre vështirësive, Balliu tha se ka ardhur momenti që PD të bashkohet dhe të fillojë të bëjë opozitë dhe jo lojëra opozitash.
“Opozitë ju e konsideronit që në vend të hiqnit Ramën, donit të hiqnit Sali Berishën. Ankimimin nuk e bën dot askush tjetër përveç nesh sepse ka vetëm një palë në këtë çështje. Mund të themi që duhet bërë apelim. Politikisht unë ndiej keqardhje të madhe që u desh gjykata për ta mbyllur këtë punë, PD i ka të gjitha asetet që ta kishim zgjidhur me njëri-tjetrit. Edhe ata që ishin kundër nesh e dinin nga ishte shumica. Refuzoj ta besoj se deputetë të PD menduan qoftë edhe një orë që Lulzim Basha ka shumicën. PD sot është pa institucione, i vetmi institucion që njihet zyrtarisht është grupi p[parlamentar, i cili duhet të mblidhet urgjentisht për të diskutuar për bashkimin për të bërë opozitë, nuk ka më lojëra opozitash”, u shpreh ai. Në përfundim, Balliu tha se tani të gjithë demokratët duhet të përpiqen për bashkim dhe për ringritjen e PD.
