Asnjë mundësi që Ilir Meta të shpërndajë Parlamentin

Nga Ylli Manjani

Edhe një herë.

Nuk bezdisem, por e kam të pamundur t’u përgjigjem të gjithëve veç e veç. Ndaj, po e risqaroj çështjen e “Shpërndarjes së Parlamentit”, sipas Kushtetutës së shkruar të Republikës së Shqipërisë.

Por, kam një kërkesë, hapeni vetë dhe lexojeni, sepse kjo çështje nuk mund të serviret si thashethem. As si opinion.

Përsëris:

Parlamenti shpërndahet në 3 raste:

1. Kur dështon të zgjedhë Presidentin e Republikës, sipas nenit 87. Besoj e kuptojmë se nuk jemi në këto kushte.
2. Kur pas zgjedhjeve nuk arrin të zgjedhë një Kryeministër, sipas nenit 96. As në këto kushte nuk jemi.
3. Kur Kryeministri humbet mocionin e besimit sipas nenit 104. As në këto kushte nuk jemi.

Këto janë rastet dhe nenet e vetme ku shkruhet togfjalëshi “Shpërndarje e Parlamentit”.

Nuk ka asnjë rrjesht tjetër që e shkruan apo e parashikon.

Nga ana tjetër, për t’i dhënë përgjigje pyetjes “A ka të drejtë Presidenti ta shpërndajë Parlamentin?”, duhet të lexoni nenin 92 të Kushtetutës së shkruar.

Është neni ku renditen të gjitha kompetencat e Presidentit.

Unë nuk shoh asnjë rresht të këtij neni që t’ja njohë këtë kompetencë Presidentit.

Por, sidoqoftë lexojeni dhe vetë.

Kjo është Kushtetuta e shkruar.

Pastaj, a ka bërë hak që ky parlament të shuhet; apo meqë nuk është numri 140, etj. Etj., janë çështje interpretimesh politike. Secili krijon pikëpamjen e vetë, ashtu siç e mendon.

Unë vetë mund të bie dakord me çdo gjë që thuhet, por Kushtetua është kaq e ftohtë sa çfarë shkrova më lart.

Edhe njëherë, nuk ju përgjigjem dot të gjithëve veç e veç. Aq më tepër, kur secili ka një interpretim të vetin… E kam të pa mundur.