Ndalohen me urdhër të Prokurorisë së Posaçme Kundër Korrupsionit dhe Krimit të Organizuar( SPAK), disa inspektorë dhe punonjës të Institutit Shtetëror Shëndetësor (ISHSH) dhe Kujdesit Shëndetësor.
Nën hetim nga SPAK janë edhe një sërë përfaqësues të subjekteve tregtare të ndryshëm, që përfitonin përmes kësaj skeme.
Të ndaluarit akuzohen për shpërdorim detyre duke lëshuar libreza punësimi në mënyrë abuzive.
Po ashtu disa prej të arrestuarve akuzohen për shpërdorim detyre duke marrë rryshfet nga subjekte tregtare, të cilat i gjenin me shkelje pas kontrolleve të kryera në to.
Më konkretisht akuzat që rëndojnë mbi ta janë: “Korrupsion pasiv i personave që ushtrojnë funksione publike”, “Ushtrimi i ndikimit të paligjshëm ndaj personave që ushtrojnë funksione publike” dhe “Shpërdorim detyre”.
Nën hetim nga SPAK janë 5 inspektorë të Institutit Shtetëror Shëndetësor 8 punonjës të Njësisë Vendore të Kujdesit Shëndetësor dhe Qendrave Shëndetësore të ndryshme në Tiranë, administratorë dhe përfaqësues të disa bizneseve të ndryshme dhe një punonjës i Drejtorisë Rajonale të Operatorit të Shërbimit të Kujdesit Shëndetësor Tiranë.
Aktualisht janë dhënë 9 “masa arrest shtëpie”, 2 “arreste me burg” dhe 3 pezullime nga detyra.
