Me marrjen e detyrës së re në qeveri si zëvendës kryeministre, Belinda Balluku tashmë ka më shumë përgjegjësi të cilat mesa duket ia ka vënë në dukje edhe Ambasadorja Amerikane Yuri Kim. Kjo e fundit ka zhvilluar një takim ditën e sotme duke e uruar për detyrën e re. Ndër të tjera, mësohet se Kim ka “porositur” zëvendësministren që të fokusohet të problemi i korrupsionit në vend sipas të cilës duhet ç‘rrënjësor, për t’u siguruar që zyrtarët të veprojnë sipas standardeve më të larta dhe të zbatojnë reformën në drejtësi.
Kim shkruan se është konfirmuar bashkëpunimi i fortë i SHBA-ve në lidhje me sulmin e fundit kibernetik kundër Shqipërisë.
“U takova me Belinda Ballukun sot për ta uruar për portofolin shtesë si zëvendëskryeministre. Ne mezi presim forcimin e bashkëpunimit në të gjitha frontet, duke përfshirë përgjigjen ndaj sfidave ndaj sigurisë së ushqimit dhe energjisë në shkallë globale të shkaktuar nga lufta e pajustifikuar e Rusisë kundër Ukrainës. Gjithashtu konfirmuam bashkëpunim të fortë SHBA-ve në lidhje me sulmin e fundit kibernetik kundër Shqipërisë. Ekspertët amerikanë nga agjenci të ndryshme po mbështesin përpjekjet e Shqipërisë me metoda shkencore; rritjen e sigurisë kibernetike për të mbrojtur qeverinë dhe qytetarët; dhe të parandaluar përsëritjet. Theksova rëndësinë e hapave më konkretë për të çrrënjosur korrupsionin, për t’u siguruar që zyrtarët të veprojnë sipas standardeve më të larta dhe të zbatojnë reformën në drejtësi. Si presidenti Biden e ka bërë të qartë, SHBA e sheh korrupsionin si një kërcënim për sigurinë kombëtare dhe ne do të ndërmarrim veprime në përputhje me rrethanat”, tha Kim.
