Një 44-vjeçar shqiptar ka përplasur mbrëmjen e djeshme një grup fëmijësh me biçikleta në Lamia të Greqisë.
Si pasojë e përplasjes është plagosur rëndë një fëmijë 14-vjeçar (djali i një mjeku të njohur në zonën e Lamias), i cili pak më vonë mbërriti i në Repartin e Urgjencës, ku edhe humbi jetën.
Ishin rreth 5 fëmijë në atë grup me biçikleta, që kishin fenerë dhe drita të pasme dhe po lëviznin në rrugën e fshatit Achinou – Karavomylou. Sipas asaj që thuhet, shoferi 44-vjeçar raportohet se i pa fëmijët në minutën e fundit, reagoi për t’i shmangur, por ishte duke lëvizur me shumë shpejtësi.
Ai manovroi për të shmangur biçikletën e parë, por humbi kontrollin dhe goditi të dytën dhe të tretën.
Si rezultat, një nga dy vëllezërit binjakë u plagos rëndë, ndërsa vëllai tjetër binjak dhe një mik i viktimës morën lëndime më të lehta.
Ndërkohë shqiptari që shkaktoi aksidentin tragjik ka rënë në prangat e policisë greke.
