Në lidhje me krimin në Devoll, ku Ali Zili 36 vjeç, vrau dy gra bashkëfshatare, ka folur vëllai i tij, Gjergj Zili. Vëllai i autorit ka mohuar faktin se viktimat, nuse e vjehërr, i kishin mbetur borxh vëllait të tij. Gjergj Zili është shprehur se 60-vjeçarja ia ka dhënë lekët të vëllait për drutë që i ka shitur, duke rrëzuar kështu dhe alibinë e policisë, se ngjarja e rëndë mund të ketë ndodhur për shkak të një borxhi të palarë. Gjergj Zili gjithashtu u shpreh se vëllain e kishte denoncuar në polici, pasi ai përdorte dhunë në familje, dhe sipas tij kur ishte i pirë nuk dinte se çfarë të bënte.
“Unë ka lënë shtetin të veprojë. Ka 2 ditë që është larguar nga shtëpia kam lajmëruar dhe kryeplakun. Kam lënë shtetin të marrë masa. Lekët që nxirrte i harxhonte në klub. Pine paketën një kafe, e rëndonte xhanin me alkool. Atë e di dhe policia se nuk është hera e parë që ka pasur punë me policinë. Unë e kam denoncuar në polici disa herë dhe para 3 javësh ishte në komisariat. Kur rëndohet xhani me alkool nuk e di sa çfarë bën. I kam thënë mos e lëshoni se mund të bëjë ndonjë vrasje. Siç u krye vrasja. Po ta rëndonte me alkool të mos i fliste njeri. Unë kam krushqi me atë familje. Plakës i kam marrë mbesën e mbesës, unë i kam lënë shtetin. Shteti le të marrë masa dhe të veprojë sipas ligjit. Drutë ia ka dhënë me lekë lekët ia ka dhënë me dorë. Asnjë lekë nuk i ka mbajtur.”
Nga ana tjetër Gjergji Zili, u shpreh se i vjen turp të dalë në fshat dhe para familjarëve të viktimave për shkak të krimit të vëllait.
“I jam shumë mirënjohës asaj familje mua më vjen rëndë ti dal para fëmijëve të saj dhe fshatarëve më vjen rëndë ti dal përpara. Kur erdhi policia isha shtrirë po bëja gjumë,. Në mëngjes unë e ndjeva se nuk ishte. Deri në orën shtatë kam kontrolluar. Nga ora 5 ia dëgjova zërin. Kur erdhi nuk më foli fare. Më tha djali po rri i menduar ky. Më rëndoi edhe situatën e pleqve se janë të dy të sëmurë. Me mua nuk fliste. Më vjen rëndë t’u dal fshatarëve dhe t’u them mirëmëngjes” – tha ai.
Fatmira Bami, rreth 60 vjeçe dhe vjehrra e saj Bukurie Bami, rreth 80 vjeçe, janë gjetur të pajeta dhe me shenja dhune rreth orës 15:15, (5 mars) në banesën e tyre. Ato kanë mbetur të vdekura si pasojë e goditjeve me sende të forta nga autori Ali Zili, i cili është arrestuar nga policia dhe ka pranuar krimin.
Ali Zili sipas policisë, dyshohet se ka hyrë për të vjedhur në banesën e viktimave dhe kur ka hasur në rezistencën e tyre, i ka dhunuar ato me sende të forta duke ju shkaktuar vdekjen. Ky i fundit ka pranuar krimin, ndërkohë mësohet se ishte me precedentë të mëparshëm penalë, për dhunë dhe për vjedhje.
