Pas debatit të ashpër parlamentar, ku Kryeminsitri Edi Rama, e pyeti parardhësin e tij në detyrë, z. Sali Berisha, nëse mund të kalojë përtej oqeanit, duke ju referuar Shteteve të Bashkuara, Ora News, ka pyetur Departamentin Amerikan të Shtetit, lidhur me faktin nëse për ish-Kryeministrin ka patur revokim apo refuzim të vizës amerikane.
Në përgjigje të pyetjes së gazetarit, Xhoi Malësia, DASH thekson se “Refuzimet për Vizë që lidhen me arsye korrupsioni publikohen nga Departamenti i Shtetit në linkun e mëposhtëm”.
Në këtë listë, emri i zotit Berisha nuk figuron, ndonëse gjenden emrat e deputetit, Tom Doshi dhe ish-Kryeprokurorit, Adriatik Llalla.
Ndërkaq, përtej emrave që bëhen publikë, Shtetet e Bashkuara, në përgjithësi nuk komentojnë për rastet individuale të vizave. Një përgjigje të njëjtë, Ora News, ka marrë edhe nga Ambasada e Shteteve të Bashkuara në Tiranë, ku deklaratat e Ramës, as nuk mohohen e as nuk kundërshtohen sa i përket vizës në aspektin personal.
Ora News ka kontaktuar edhe Kryeminsitrin, Edi Rama, përmes një lidhjeje telefonike, ku shefi i ekzekutivit nuk e ka konsideruar një akuzë deklaratën që bëri në drejtim të para-ardhësit të tij në detyrë, një ditë më parë në sallën e parlamentit. Rama u shpreh se ka bërë thjeshtë një pyetje, prej së cilës pret përgjigje nga zoti Berisha.
