Do të jenë 40 të rinj nga Ballkani që mblidhen në Tiranë për të diskutuar për problematika që shqetësojnë rininë e sotme në rajon. Ata janë nga Shqipëria, Bosnja dhe Hercegovina, Kosova, Mali i Zi, Serbia dhe Maqedonia.
Bashkia e Tiranës në bashkëpunim me Prezencën e OSBE-së në Shqipëri dhe Zyrën Rajonale për Bashkëpunim Rinor (RYCO) njoftoi thirrjen për aplikime për të gjithë të rinjtë të cilët dëshirojnë që të marrin pjesë në trajnimin me temë “Shtigje rinore: Promovimi i Vlerave të OSBE-së në Ballkanin Perëndimor” që do të mbahet në Tiranë nga data 13-17 Shtator 2017.
“Në shtator duam që 40 të rinjtë që do të vijnë nga vende të tjera të Ballkanit Perëndimor, nga Mali i Zi, Maqedonia, Kosova, Serbia dhe Bosnja të kenë mundësi të zbulojnë Tiranën, Shqipërinë, të kenë mundësi të organizojnë debate mes njëri-tjetrit, si një mënyrë për të kuptuar se si një gjeneratë e re e të rinjve dhe aktivistëve në Ballkan mund të çojë përpara ambicien tonë për një rajon që është europian përpara se të regjistrohet zyrtarisht në Europë, që të fillojë edhe të sillet pak më evropian brenda vetes” – theksoi Veliaj.
Afati i regjistrimit për të gjithë ata të rinj që dëshirojnë të bëhen pjesë e kësaj nisme është data 13 Gusht.
