Korçë
Më datë 30.07.2017, jemi njoftuar se në fund të parkut “Rinia” të qytetit të Korçës, ka rënë zjarr flakët e të cilit mund të rrezikonin gjithë sipërfaqen e këtij të fundit, njofton Policia.
Menjëherë në vendngjarje kanë shkuar shërbimet e rendit, zjarrfikëset, si edhe shërbimet e emergjencave civile të cilat kanë konstatuar tre vatra të mëdha zjarri.
Si rezultat i angazhimit dhe ndërhyrjes në kohë të strukturave të mësipërme, u bë e mundur fikja e zjarrit dhe shmangia e dëmeve të mëtejshme që mund të shkaktonin flakët.
Nga të dhënat paraprake, dyshohet se kemi të bëjmë me zjarrvënie të qëllimshme.
Policia e Korçës, ka shoqëruar në Komisariat disa persona dhe po punon për identifikimin/kapjen e autorëve, si edhe zbardhjen e plotë të rrethanave të ngjarjes.
Fier
Një vatër zjarri është hapur pasditen e sotme në vendin e grumbullimit të mbeturinave në Fier. Shtëllunga të mëdha tymi janë përhapur në lagjet “Shefqet i Madh” dhe “8 Shkurti”. Zjarrfikësit janë në terren dhe po punojnë për shuarjen e flakëve.
Elbasan
Një vatër zjarri është shënuar edhe në masivin pyjor të Bbajes në Librazhd. Terreni i vështirë e bën të vështirë ndërhyrjen nga toka.
Durrës
Një vatër zjarri është shënuar edhe në Rashbull të Durrësit. Zjarrfikësit po punojnë për shuarjen e flakëve.
