Kreu i PDIU-së Shpëtim Idrizi ka deklaruar se PDIU do të jetë surpriza e zgjedhjeve në 25 qershor dhe surpriza sipas tij do të jetë edhe në Shkodër.
Gjatë një takimi me banorët e Shkodrës për zgjedhjet e 25 qershorit, Idrizi u shpreh i bindur për fitoren e tij në Dibër, Tiranë, Vlorë, Fier, Durrës, Korçë dhe Elbasan.
Në këtë takim ishte i pranishëm edhe kryesuesi i listës për deputet në qarkun e Shkodrës, Sait Fishta.
“Ne do të jemi pranë maxhorancave në pushtet, pikërisht për ato forca politike që i bashkohen kauzave kombëtariste. Vazhdimisht kam thënë që është edhe një qytet që ne do të bëjmë surpriza. E unë jam i bindur që Dibrës, Tiranës, Vlorës, Fierit, Durrësit, Korçës, Elbasanit, do t’i bashkohet edhe fitorja jonë në Shkodër, që do të jetë diamant në atë fitore të madhe të PDIU-së, të burrave e grave që ju do t’i mbani mend gjatë në Parlamentin e Shqipërisë”, është shprehur Idrizi.
Kryetari i PDIU-së theksoi se në Shqipëri ekziston prej vitesh pluralizmi dhe pushteti nuk mund të përqëndrohet në dy apo tre duar.
“Keni parë këto kohë që dikush ka harruar se ka ardhur pluralizmi dhe beson që mund ta drejtojë këtë vend në dy apo tre duar. Ata që luftuan kundra pushtetit absolut të mbretit, luftuan pikërisht për të pasur shumë më tepër pushtete, shumë më tepër njerëz në vendimarrje. Kjo është arsyeja që unë them, ruajna Zot nga pushteti i dy-tre personave, nga pushteti i të marrëve dhe atyre që duan dhe kanë bërë që shqiptarët të largohen nga ky vend. Kjo është arsyeja që ne themi në moton tonë se kemi “Veç një Atdhe”. Ne kemi “Veç një Atdhe” për të gjithë ata që duan ta lenë këtë vend, kemi veç një Atdhe për të gjithë ata shqiptarë dhe të rinj që u është vrarë shpresa”-tha Kreu i PDIU-së.
Idrizi u bëri apel shkodranëve që të votojnë PDIU-në dhe të mbështetin Sait Fishtën.
