Albana Vokshi: manifestimi i sotëm është thirrje kombëtare në mbrojtje të jetës dhe integritetit të grave anembanë vendit
Albina Deda, Albana Vokshi, Arbiola Halimi drejtuan sot protestën e grave demokrate kundër kryeministrit Edi Rama. Në protestëne grave të PD-së ka munguar deputetja demokrate Jozefina Topalli.
Duke folur para turmës së grave deputetja Deda, nuk nguroi të akuzojë Ramën si një frikacak, ndaj sipas saj ai mban afër kriminelët që ka futur në parlament dhe administratë. “I zhveshur siç je nga çdo normë banale, morale nuk pres që të më kërkosh falje. Gënjeshtra pas fyerjes pritej nga ti dhe nga soji yt. Je dhe një frikacak i madh, prandaj mban afër dhe kriminelë që ke sjellë aty në parlament dhe në të gjithë zyrat e shtetit”, tha deputetja Albina Deda.
Ndërsa kryetarja e Grave demokrate, deputetja Albana Vokshi përsëriti akuzat ndaj kryeministrit duke theksuar se sjellja e tij është e pafalshme. Vokshi tha se manifestimi i sotëm është një thirrje kombëtare në mbrojtje të jetës dhe integritetit të grave anembanë vendit.” Ky manifestim i sotëm i joni është një thirrje kombëtare, të gjitha sulmet nga grave dhe vajzave janë një kërcënim prezent për të drejtat e gjithë popullësisë.Protesta jonë sot nuk është manifestim politik, por marshim kombëtar për të drejtat e grave në të gjithë Shqipërinë”, tha Vokshi.
