Sot është afati i fundit i PD-së të plotësojë listën e kandidatëve për deputet si dhe të dorëzojë formularët e dekriminalizimit.
Komisioni Qëndror i Zgjedhjeve i dha dje Partisë Demokratike afat 24 orë për plotësimin e listave.
Përfaqësuesi i PS-së Eridjan Salianji kërkoi dje miratimin e emrave të opozitës siç janë paraqitur, ku 94 kandidatë ishin sipas kritereve.
“Një parti opozitare që do të bëjë republikën e re e ka thënë do ta bëjë me 94 kandidatë. Unë po them që këtë listë që ka sjellë e ka mirë mënduar, se me këtë listë fiton zgjedhjet ta miratojmë.”- shprehet Salianji.
Kjo kërkesë është mbështetur edhe nga Denar Biba dhe anëtarët e majtë të KQZ-së.
“E kanë sjellë me vetëdije edhe mungesën në listë, pra duke qenë 46 më pak edhe mosrespektimin e femerave në listat e tyre. E kanë sjellë me vetëdije.”- shprehet Biba.
Ndërkohë kryetari i KQZ-së Klemend Zguri deklaroi se do të dorëhiqet nga detyra nëse do të votohen listat që kanë një sërë parregullsish. Zguri kërkoi që vendimet në administrimin e procesit të mos merren me forcën e kartonit, por në frymë të kodit zgjedhor.
“Nëse vërtet e dëshironi këtë gjë që pasi thoni një sërë parregullsish që listat kanë dhe pasi përfundoni këtë, thoni që ta votojmë, unë nuk jam i gatshëm ta bëj këtë propozim, nuk jam i gatshëm ta votoj këtë propozim dhe nuk jam i gatshëm të rri në këtë tavolinë nëse do të shkojë arsyetimi deri këtu.”- shprehet Zguri.
