Një i vdekur dhe dy të plagosur, është bilanci i një atentati të ndodhur mbrëmë në Vlorë. Viktima është Ergys Gjioveshaj, 33 vjeç, i cili ka mbetur i vrarë në ambientet e një lokali në lagjen “Ujë i Ftohtë” Vlorë. Nga hetimete para evidentohet se viktima njihej si person me precedente penalë. Nga atentati ndaj Ergys Gjioveshaj, kanë mbetur të plagosur tre persona.
Të plagosurit janë Arsonel Llanaj 26 vjeç i cili punonte si kamarier në këtë lokal dhe Florjan Hila 28 vjeç instrumentist i bandës që luante muzikë live mbrëmjen e djeshme si dhe 32 vjeçarja Arta Lluka. Mjekët sqaruan se i plagosuri, Arsonel Llanaj ka marrë një plumb në arterien kryesore të këmbës dhe për kurim më të specializuar është dërguar në Tiranë. Ndërsa dy të plagosurit e tjerë, përkatësisht Arta Lluka ka marrë dy plumba në pjesën e legenit dhe është jashtë rrezikut për jetën, ndërsa Florjan Hila një plumb në pjesën e shpatullës.
Policia e Vlorës ka shoqëruar 3 persona me të cilët po punohet për zbardhjen e ngjarjes, si dhe jane ngritur pika kontrolli, si dhe forca të shumta policore po krehin zonën përreth vendngjarjes për kapjen e autorëve.
Nga hetimet rezulton se vrasja ka ndodhur për shkak të hakmarrjes, pasi viktima njihet si person me precedente penalë. Viktima e atentatit të mbrëmshëm, akuzohej se në vitin 2001, ka qenë bashkëpunëtor në vrasjen e Laert Alushit, pas së cilës është larguar nga Shqipëria. Ai u arrestua në vitin 2011 në Vjenë të Austrisë dhe u ekstradua. Gjioveshaj ishte dënuar me 12 vjet burg për vrasjen e Laert Alushit, ndërsa Florian Meçe u dënua si autori i kësaj vrasje, me 22 vjet burg. Nuk dihet se si autori ishte i lirë pasi duhet të vuante dënimin me 12 vite burg, por mësohet se çështja ka kaluar në disa shkallë të gjyqësorit.
