“Jemi 8 milion shqiptarë të ndarë në pesë shtete, le të bashkohemi në një treg të përbashkët dhe jo si sot kur shkëmbimi ekonomik i Shqipërisë më Kosovën është sa një e pesta e asaj që Kosova ka me Serbinë. Kjo është e pafalshme”
Sekretarja e Përgjithshme e PDIU-së, Mesila Doda, ishte sot në Universitetin e Durrësit për të folur për shqiptarët e ndarë në pesë shtete. Në referatin e saj para studentëve të Universitetit të Durrësit, Doda foli për shqiptarët e Kosovës, Çamërisë, Malit të Zi, Mqedonisë, Preshevës e kudo ndodhen shqiptarë. Ajo përsëriti propozimet e PDIU për bashkimin e shqiptarëve në një treg të përbashkët ekonomik.
“Jemi rreth 3 milion shqiptarë në teritorin e Republikës së Shqipërisë, 2 milion e pak në Kosovë, rreth 800 mijë shqiptarë në Maqedoni. Ka shqiptarë në Mal të Zi, në Preshëvë. Pra shqiptarët janë të ndarë në pesë shtete. Jemi rreth 8 milion shqiptarë të ndarë dhe herët e vonë do të duhet të bashkohemi. Bashkimi ndodh pikë së pari përmes bashkëpunimit ekonomik.
Pikësëpari ne dhe kosovarët nuk jemi dy shtete fqinjë, jemi thjeshtë një komb dhe do të duhet të sillemi si të tillë. Shteti shqiptar dhe ai i Kosovës janë shumë larg atij bashkëveprimi që do të duhej të ishte.
Shqipëria do të ishte një treg interesant për investimet e huja por nëse jemi të ndarë, dy milion në një krah, tre në një tjetër 1 në një tjetër e kështu me rradhë nuk do të kemi përfitime. Kështu ne nuk mund ti afrohemi botës së biznesit ndërkombëtar për investime.
Ne jemi për tezën e bashkëpunimit ekonomik ndër shqiptarë, rreth 8 milionë që jetojnë në pesë shtete.
Le të kemi një treg të përbashkët të heqim barrierat mes nesh. Dakord që bashkimi në Evropë është një teori e gjithëpranuar por nga ana tjetër kjo Evropë është e burokratëve dhe ne si shqiptarë nuk na ofron gjithçka. Na duhet të kemi një plan rezervë për veten tonë. Është padyshim bashkëpunimi ekonomik mes nesh. Shkëmbimi ekonomik i Shqipërisë më Kosovën është sa një e pesta e asaj që Kosova ka me Serbinë. Kjo është e pafalshme“, tha Doda.
Në leksionin e saj në Universitetin e Durrësit, Doda foli për çështjen e Çamërisë. Ajo ka sjellë një përshkrim të përmbledhur të tragjedisë së Çamrisë, duke sjellë detaje të rëndësishme historike për studentët. Ajo shpjegoi pse çështja e Çamërisë, është kauza e PDIU-së. Ajo foli për kalvarin e vuajtjeve të popullsisë së Çamërisë nën genocidin grek, por edhe nën regjimin komunist.
