Kryetari i Partisë Demokratike Lulzim Basha tha se do çmontojmë nga rrënjët koalicionin e 1 prillit, si dhe trajtimin e popullit si budalla nga një grusht pushtetarësh të inkriminuar deri në palcë.
Në fjalën e mbajtur në çadër para protestuesve Basha ironizoi koalicionin e PS me LSI që u firmos më 1 Prill, duke e cilësur si dita e budallenjve.
“Dita e budallenjve. Dita kur përgatiteshin gënjeshtrat e mëdha, bashkautorët kanë qeshur, apo nënqeshur, se jo vetëm ka qenë dita e gënjeshtrave por dhe dita për t’i trajtuar shqiptarët si budallenj për t’u marrë votat dhe të bësh ça të duash me ta” tha Basha. Gjithashtu Basha lëshoi dhe një mesazh për Ramën dhe koalicionin e 1 prillit ku i tha se budalla është ai që pranon të trajtohet si budalla dhe shqiptarët kanë vendosur të mos trajtohen më kurrë si të tillë nga një bandë hajdutësh e bërë njësh me krimin e organizuar.
Më tej Basha ripërsëriti kërkesat e opozitës për qeveri teknike që sipas tij do të garantojë zgjedhje të lira dhe të ndershme.
