Ligjvënësja e PDIU-së: Opozita kërkon më shumë mekanizma shtesë për garantimin e zgjedhjeve dhe ka gjithë të drejtën e zotit për t’i kërkuar këto garanci. Ndaj ne propozojmë një Drejtor policie dhe gjithë zinxhirin drejtues të policisë, të jenë persona teknikë dhe të vendosur me konsensus nga të gjitha palët si dhe një grup prokurorësh të instalohet pranë Komisionit Qëndror të Zgjedhjeve
“Pakt kombëtarë për reformën në drejtësi, reformën zgjedhore si dhe integrimin, që e nxjerr vendin nga kriza ku është mbërthyer”, është ky propozimi i përsëritur i PDIU-së, që vjen nga ligjvënësja e kësaj partie Mesila Doda. Në takimin e organizuar me simpantizantë dhe përkrahës të PDIU-së ku ishte i pranishëm edhe kryetari i PDIU-së në Durrës, Krenar Lasko, Sekretarja e Përgjithshme e kësaj partie Mesila Dodas, theksoi se “Ne të gjithë duam të shkojmë në zgjedhje, por duhet të shkojmë si njerëz që kemi siguri. Opozita kërkon më shumë mekanizma shtesë për garantimin e zgjedhjeve dhe ka gjithë të drejtën e zotit për t’i kërkuar këto garanci”, tha Doda.
Deputetja Mesila Doda, renditi disa pika të tjera të paktit që propozon PDIU për të nxjerrë vendin nga kriza e thellë ku është përfshirë prej muajsh. Garancia për zgjedhjet përmes policisë teknike e prokurorit special, është një prej tyre e ndër më të rëndësishmet.
“Cilat janë propozimet që ne bëjmë? PDIU propozon që Drejtori i Policisë dhe gjithë zinxhiri drejtues i policisë, të jenë persona teknikë dhe të jenë të vendosur me konsensus të plotë nga të gjitha palët. Ky është propozimi ynë i parë për të rritur shkallën e sigurisë për zgjedhjet e ardhshme. Ne kemi propozuar edhe që një grup prokurorësh të instalohet pranë Komisionit Qëndror të Zgjedhjeve, të evidentojë çdo shkelje të fushatës zgjedhore dhe gjatë numërimit të votave. Rreth 500 mijë vota prodhojnë 0 deputetë, kjo sepse dy partitë e mëdha kanë rënë dakort që ti ndajnë mes tyre këto vota dhe të prodhojnë mandate shtesë për veten e tyre. Ky sistem zgjedhor ka prodhuar 7 mandate shtesë për një forcë politike dhe 9 mandate shtesë për forcën tjetër. Kjo është vjedhja që i bëhet qytetarëve të Shqipërisë ditën për diell. Prandaj ne duhet ta thyejmë këtë pakt kriminal, me qëllim që ne të hyjmë të lirë në procesin zgjedhor dhe të kemi mundësi që secili të marrë përfaqësuesit e vet në Parlamentin e Shqipërisë, sipas rezultateve. Propozimi tjetër i PDIU-së është ndryshimi i sistemit zgjedhor, jo koalicioneve parazgjedhore, koalicioni të bëhet pas zgjedhjeve dhe një sistem propocional me një zonë zgjedhore, sepse Shqipëria meriton të jetë një zonë zgjedhore, nuk ka arsye pse të ndahemi në 12 zona. Kjo është një mundësi e mirë për të hyrë në Parlament dhe për të paraqitur në mënyrë dinjitoze votën e qytetarëve, por mbi të gjitha të kemi mundësi që të sjellim një Parlament të drejtë ku vota e qytetarëve vlerësohet në mënyrë të barabartë”,- u shpreh deputetja Mesila Doda.
