Kreu i Grupit parlamentar të PS-së, Gramoz Ruçi e ka cilësuar protestën e opozitës dhe artikulimin e saj për të mos hyrë në zgjedhje si përpjekje për destabilitet të vendit.
Nga Fieri ku ishte i pranishëm në aktivitetin e organizuar për shpërndarjen e 501 lejeve për legalizime në Portëz, Ruçi tha se ne e kemi provuar destabilitetin në vitin 1997, në kohën e piramidave.
Më tej ai ka akuzuar PD-në se ata nuk duan që të bejnë zgjedhjen e presidentit që është pas një muaji, dhe kjo thekson Ruçi është fillimi i një krize.
“U hodh mbrëmë nga çadra teza që të mos ketë zgjedhje, kjo domethënë që në shtator t’i mbarojë mandati parlamentit aktual. Kjo do të thotë që Shqipëria të ngelet pa parlament, pa qeveri dhe kjo është kriza. Kjo që po ndodh tani është përpjekje për destabilitet” tha Ruçi.
