Deputetja e Partisë Demokratike Albana Vokshi deklaroi se zgjedhje të lira dhe të ndershme nuk mund të ketë më qeverinë Rama. Për këtë arsye sipas Vokshit duhet një qeveri tenike që të sigurojë votën e qytetarëve.
E pranishme në çadrën, ku po zhvillohet protesta Voshki tha: “…ashtu sikurse në 26 vite më parë, kemi qenë pranë këtij vendi për të rrëzuar diktatorin më të egër, sot pas 26 vjetësh sot po unë dhe shumë qytetarë të tjerë po luftojmë për të njëjtat kauza. Ne kërkojmë të stopojmë instalimin e një neo-diktature.”
Më tej ajo tha se protesta e opozitës do të përshkallëzohet dhe se do të bëhet me dije në ditët në vijim se si do të procedohet.
Gjithashtu, Vokshi duke mos e konsideruar protestën si një çështje vetëm të opozitës, por e të gjithë qytetarëve shqiptarë tha që PD nuk kërkon kalim pushtetesh, por qeveri teknike.
“Qytetarët janë të vendosur të mos lëvizin, derisa të arrihet që të ketë zgjedhje të lira dhe të ndershme dhe tek to nuk mund të shkohet me këtë qeveri, e cila ka kriminalizuar parlamentin, administratën dhe ekonominë dhe tani po tenton të kriminalizojë edhe votën. Ne kërkojmë qeveri teknike, nuk kërkojmë kalim pushtetesh. Ne kërkojmë qeveri teknike që të zhvillojë zgjedhje të lira dhe të ndershme. Në fund të fundit, ajo që na mbledh neve është respektimi i të drejtave themelore të gjithë qytetarëve shqiptarë”, tha Vokshi.
