Ministria e Financave: Do kalojmë në sitë veprimtarinë dhe pagesat e kompanisë britanike
Ministria e Financave ka njoftuar se do të kalojë në sitë veprimtarinë 2 vjecare të Crown Agents në Shqipëri dhe pagesat që janë bërë. Likujdimi total i kompanisë do të bëhet në fillim të prillit, kohë kur në Tiranë do të vijnë ekspertët e FMN-së që do të bëjnë rivlerësimin e Prodhimit të Përgjithshëm Kombëtar. Kontrata me Crown Agents parashikonte rritje të të ardhurave me 1% të GDP-së në vit. Mosrealizimi i këtij planit, do të kushtëzonte me 25% pagesat për britanikët. Në dy vitet që operojnë në Shqipëri britanikët kanë marrë për asistencën në dogana 6.8 milionë euro. Ndërkohë në prill pritet të bëhet likujdimi i plotë i kontratës mbi 8 milion euro.
Reagimi i qeverisë për rishikim të hollësishëm të kontratës, vjen pas publikimit nga Crown Agents të fakteve konkrete se si bëhet kontrabandë me mallrat e akcizës. Në disa prej rasteve të shkeljeve që britanikët kanë kapur është përfolur se bëhej fjalë për klientë pranë qeverisë.
