Dy fatura në një derë, diferenca 77 mijë lekë
Arben Shytaj ka një aktivitet privat në Tiranë dhe është pagues i rregullt i ujit. Ai është qytetar i Tiranës dhe përpiqet të jetë i rregullt me detyrimet që ka ndaj shtetit.
Kësaj here ka vënë re një gjë të pazakontë. Si kurrë më parë Ujësjellësi i Tiranës i ka lëshuar poshtë derës dy fatura për ujin. Fillimisht, ai ka menduar se është një lajthitje, sepse dy faturat kanë një diferencë jo të vogël, por 77 mijë lekë.
Arbeni ka menduar se ka të bëjë me një gabim, ndaj vendos të ankohet pikërisht në zyrën e UKT-së në Tiranë. Atje e presin me këmbët e para dhe e përzënë, madje merr me vete kërcënimin se do ja ndalojnë ujin. E detyrojnë të largohet, sepse sistemi nuk punon, sepse nuk ka internet.
Meqë Arbeni ka internet në shtëpi, sepse e paguan edhe këtë faturë, ai shkruan në profilin e tij në facebook si më poshtë:
“Përshëndetje! Kam një biznes dhe jam dakord që duhet të bëj pagesën e ujit…
Shkoj dhe kërkoj faturat që kam për të paguar në një zyrë UKT…
Dhe marr faturën e parë për muajin janar, pas disa ditësh më vjen faturisti dhe më sjell një faturë tjetër po të muajit janar me një shumë komplet tjetër …
Me një diference diku te 77 mijë lekë …
Shkoj për t’u ankuar, dhe një zonjë më tha që nuk ka internet dhe nuk funksionon sistemi…
Dhe nëse nuk i paguaj këto vijnë dhe na ndërpresin ujin… Këto po na vjedhin pa hesap. Bashkangjitur keni dhe foton. #shtetiqedeshem!”
Duket Arbeni është votues i majtë dhe ndjehet i zhgënjyer dyfish.
Drejtuesi i Ujësjellësit të Tiranës, i cili konsiderohet të jetë kanakari i Koço Kokëdhimës, paraqitet tek kryeministri si një nga shembujt përse “Rilindja” po “shkëlqen”, madje ky i fundit e ka për zemër ta përdorë si ilustrim i suksesit të reformave të tij. Nga UKT disa kohë më parë u hodhën në rrugë qindra punonjës, të cilët më lehtë e kishin të rigjenin të drejtën e tyre në zyrën elektorale të Sarandës se sa në Tiranë.
