Ministri i Jashtëm i Shqipërisë, Ditmir Bushati, ka marrë pjesë në ministerialin e radhës së vendeve antare të NATO-s, në të cilin është diskutuar kryesisht për marëdhëniet mes Aleancës dhe Bashkimit Evropian.
Nga Brukseli ministri Bushati tha se më 13 dhjetor Shqipëria pret një tjetër lajm pozitiv në lidhje me integrimin europian, ku vendet anëtare, mes tyre edhe Greqia, pritet të mbështesin rekomandimin për çeljen e negociatave për anëtarësim në BE.
Në fjalën e tij përpara përfaqësuesve, Ministri Bushati theksoi mes të tjerash rëndësinë e intensifikimit të bashkëpunimit NATO-BE për përballimin efikas të sfidave aktuale të sigurisë duke sjellë si shembull të këtij bashkëpunimi rajonin tonë dhe veçanërisht Kosovën, ku sipas tij, si NATO ashtu dhe BE kanë shënuar një sërë arritjesh pozitive.
Gjatë punimeve të mbledhjes, shefi i diplomacisë shqiptare pati edhe një diskutim trilateral me homologun e tij kroat, Davor Ivo Stier si dhe atë malazez, Srdjan Darmanovic.
Ndërkohë, Sekretari i Përgjithshëm i Organizatës, Jens Stoltenberg, tha se ky ministerial shënon një tjetër pikë të rëndësishme për forcimin e marrëdhënieve mes palëve.
Në këtë ministerial Bashkimi Evropian u përfaqësua nga shefja e diplomacisë Federica Mogherini, ndërkohë që i pranishëm ishte edhe Sekretari amerikan i Shtetit John Kerry.
Ky i fundit zhvilloi në këtë mënyrë takimin e tij të fundit në cilësinë e kreut të diplomacisë amerikane, duke qenë se mandati i Administratës Obama do të përfundojë më datë 20 Janar të vitit të ardhshëm. Krahas takimit me Sekretarin Stoltenberg, Kerry zhvilloi edhe një diskutim me Ministrin e Jashtëm të Turqisë.
