Pak ditë më parë u shpall fituesi i koncensionit të segmentit të rrugës Milot-Morinë, një proces që duket se mban “erë”, një proces që duket të jetë një aferë e qartë korrupsioni që tregon se si një firmë, megjithëse e skualifikuar hyn në një hulli të gjatë ankimimi jashtë afateve ligjore. Ky ankimim për çudi pranohet dhe nga një firmë e skualifikuar bëhet fituese e një koncesioni qindra milionë euro.
Në dokumentacionin zyrtar, KVO (Komisioni i Vlerësimit të Ofertave) në Ministrinë e Transporteve dhe Infrastruktures, shpall fitues një bashkim shoqërish turke, e cila u shpall fituese me gjashtë firma të komisionit dhe një abstenim, ndërkohë disa shoqëri të tjera, konkurente në këtë garë, u skualifikuan, duke u mbështetur në procedurën konkurruese, sipas VMK nr.634.
Ajo që bie në sy është fakti se bashkimi i shoqërive fituese, shpallur në KVO, plotëson në çdo detaj kërkesat e ligjit, por pas një procesi ankimimi të dyshimtë pranë KPP-së, i cili emërohet nga kreu i qeverisë, ka ndodhur përmbysja e madhe.
KPP-ja në mënyrë skandaloze ka pranuar një ankimim pesë ditë më vonë se afati ligjor, ku ka hedhur poshtë një procedurë të plotë ligjore nga Ministria e Transportit dhe Infrastrukturës, për të shpallur fitues një bashkim operatorësh, ku shfaqen edhe dy subjektet shqiptare “Salillari” dhe “Kastrati”.
Nuk e fiton koncensionin një kompani e huaj që garanton një investim 360 milionë euro, por fitues shpallet bashkimi i disa kompanive, ku janë edhe dy të sipërpërmendurat, të cilat ofrojnë si investim për këtë rrugë rreth 70 milionë euro më pak. Ky fakt tregon se KPP ka disa skandale në vendimin e tij. KPP ka pranuar një ankimim jashtë afateve ligjore dhe komisioni nuk ka marrë parasysh 70 milionë euro investime më shumë.
