Lëkundje të forta tërmeti janë ndjerë në orët e mbrëmjes së të shtunës në jug të vendit, por edhe në Tiranë.
Epiqendra e tërmetit ka qenë në afërsi të Janinës në Greqi, shumë pranë kufirit me Shqipërinë. Tërmeti ka qenë me mangnitute 5.3 ballë i shkallës rihter.
Në qytetet e jugut të Shqipërisë, edhe pse lëkundjet kanë qenë shumë të forta, nuk raportohet për dëme.
Ndërkohë i gjithë veriu i Greqisë në orët e vona të mbrëmjes së të shtunës ka patur lëkundje të shpeshta tërmeti, por më i forti ka qenë ai në afërsi të Janinës.
Sipas institutit gjeodinamik të Athinës, epiqendra e tërmetit është 16 kilometra në veri-perëndim të Janinës, në zonën mes qytetit të Janinës dhe Kalpaqit, vetëm 20 kilometra larg kufirit me Shqipërinë.
Sipas këtij instituti, thellësia e tërmetit ishte 10 kilometra, çka e bëri lëkundjen edhe më të fortë.
