Kryetari i Opozitës , Lulzim Basha në një deklaratë për median ka reaguar lidhur me avionin e rrëzuar këtë të enjte në Ishëm, duke thënë se, “është prova e re që tregon se Karteli i Drogës punon çdo ditë, pa ndërprerje dhe në të gjitha rrugët”.
Basha është shrehur se mohimi nga Rama i denoncimit që bëri në Parlament opozita është përpjekje për të fshehur ngjarjen, për të fshehur të vërtetën e trafikut ajror të drogës.
Sipas kreut të Partisë Demokratike, “të gjitha të dhënat tregojnë se avioni është porositur pikërisht nga Karteli i Drogës në zonën e Krujës, për të marrë drogën e Bushit të Ramës, që ka mbuluar gjithë zonën deri 2 kilometra larg Aeroportit të Rinasit, ku, siç kemi denoncuar me foto dhe fakte, janë mbjellë mbi 50 mijë rrënjë”, ka deklaruar Basha.
“Kjo është Shqipëria e zhytur në drogë dhe narkotrafik në të gjitha format. Ka ardhur koha që shqiptarët ta çlirojnë vendin nga sundimi i Kartelit të Drogës që shkatërron ekonominë, sjell krime dhe vret votën e lirë”, ka shtuar Lulzim Basha.
