Nga Luljeta Progni
Në shtator të vitit 2014, ministrja e arsimit Lindita Nikolla, foli për problematikën, me të cilën përballej sistemi i teksteve shkollore duke premtuar zgjidhjen përfundimtare, jo vetëm me cilësinë e teksteve, por edhe me shpërndarjen në kohë të tyre.
Ja çfarë thoshte ajo në një intervistë për gazetaren Ilva Tare më 19 shtator 2014, pra vetëm një vit pasi kishte marrë detyrën e Ministres së Arsimit: “Në fund të muajit fillojmë procesin e ristrukturimit dhe të një reforme tërësore në tekstet shkollore për vitin tjetër. Tekstet që lidhen me lëndët shkencore do bëhen konform të gjithë standardeve europiane të teksteve më të mira. Ne do të kontraktojmë një shtëpi të huaj botuese prestigjoze europiane, e cila do të mundësojë në partneritet me ekipet shqiptare përshtatjen e këtyre teksteve. Dhe tekste nuk do të ketë më një mori alternativash, po një tekst të vetëm”.
Kaluan dy vite dhe asgjë s’ka ndryshuar. Asnjë prej premtimeve të zonjës Nikolla nuk është mbajtur dhe sot prindërit e mësuesit përballen me të njëjtën situatë kaotike me tekstet shkollore, si çdo shtator i mëparshëm.
Problemi i parë është se Ministria e Arsimit nuk ka pajisur ende shtëpitë botuese të librit shkollor me pullën e sigurisë për tekstet shkollore në prag të hapjes së sezonit të ri arsimor. Problemi i dytë është ai i teksteve të klasës së dhjetë, për miratimin e të cilave ishte sot afati i fundit. Shtëpitë botuese që fitojnë të drejtën të prodhojnë këto tekste, nuk kanë kohë të mjaftueshme për të garantuar sasinë e duhur në kohën e duhur për tekstet e klasave të dhjeta në të gjithë Shqipërinë. Më 13 shtator fillon viti i ri shkollor dhe deri atëherë mbeten vetëm dhjetë ditë kohë. Duke marrë parasysh procedurat burokratike të dy palëve, ministrisë dhe shtëpive botuese, duket se nxënësit e klasave të dhjeta do të shkojnë me çantën bosh jo vetëm ditën e parë të shkollës, po ndoshta disa muaj.
27.al kontaktoi disa shtëpi botuese, por edhe Ministrinë e Arsimit për të marrë sqarime rreth këtyre problemeve. Shtëpitë botuese konfirmojnë se shumica e teksteve shkollore kanë mangut pullën e sigurisë. Pullat e sigurisë të prodhuara për tekstet e viti kërkojnë një kohë të gjatë të mbërrijnë në Shqipëri pasi ato prodhohen në Kinë. Tenderi për prodhimin e tyre, duket se është organizuar vëtëm pak ditë më parë. Sidoqoftë, disa shtëpi botuese janë duke e zgjidhur një pjesë të problemit me pullat që ata kishin në magazinë nga viti i shkuar.
Ministria e Arsimit ka lënë në kufijtë ekstremë të kohës organizimin e tenderit për prodhimin e pullave të sigurisë. Për Ministrinë e Arsimit dhe udhëzimin e saj, kjo situatë është krejt normale. Ndërsa përgjigja e ministrisë pse nuk janë sot në treg tekstet shkollore është tipike burokratike: “Nuk ka përfunduar akoma afati që kemi përcaktuar në udhëzim”.
Ministria ka përcaktuar si kohë për ndarjen e librave afatin 25 gusht deri në 12 shtator, ndërkohë që dita e parë e shkollës është më 13 shtator. Pullat e sigurisë mund të mbërrijnë në Shqipëri në kufijtë e kohës së përcaktuar dhe librat mund të jenë të gjithë gati pikërisht më datë 12 shtator e sipas ministrisë është gjithçka në rregull.
Por, prindërit e nxënësit s’janë dakord, sepse më datë 12 shtator duhet të dynden të gjithë prindërit e Shqipërisë nëpër klasat që ka përcaktuar ministria për të ndarë librat dhe atje kuptohet se do të krijohet një situatë kaotike. Këtë e kemi përjetuar çdo shtator; rradhë të gjata prindërish e fëmijësh duke pritur pas dyerve për të marrë librat, sherr e shamatë mes tyre për prishjen e radhës, të shara shkollave e qeverisë, një katrahurë e vërtetë.
Ku janë premtimet e ministres Nikolla dhe çfarë do të bëjë ajo me deklaratat e saj kundër ish-zyrtarëve demokratë të ministrisë që ajo sot drejton, për vonesat në ndarjen e teksteve e të tjera probleme që e shoqërojnë? Asgjë nuk ka ndryshuar, madje situata është përkeqësuar.
Mjafton procedura e stërzgjatur dhe e dyshimet për disa tendera, që të mbahen peng gjithë nxënësit e Shqipërisë, që ata të mos kenë mundësinë të marrin në kohë librat e tyre. Të zvarriten deri kur ministria të jetë e bindur se tenderi për pullat, për tekstet e çfarëdolloj tenderi të jetë kopsitur siç duhet.
Ministrja e preferuar e Edi Ramës, “Po shkruan faqen e Rilindjes së arsimit parauniversitar” (Kështu shkruante Rama në facebook, në qershor 2014).
