Gjatë një konference që po zhvillon me gazetarët Sali Berisha u pyet në lidhje me pjesëmarrjen në protestë të deputetëve të grupit të Alibeajt. Berisha tha se së pari çdo deputet i PD e ka detyrim moral, por edhe ligjorë të dalë në mbështetje të qytetarëve në shesh. Ai tha si i përshëndet ata dhe padyshim i konsideron deputetë të grupit parlamentar.
“Çdo deputet i PD e ka detyrim moral dhe ligjor që të marrë pjesë në protestat e PD. Ajo protestë ishte për qytetarët. Unë nuk i ndaj deputetët, ata janë deputetë të Partisë Demokratike dhe unë i pranojë si të tillë, madje i përshëndes që u bënë pjesë e protestës. Thirrja ka qenë gjithmonë e hapur për të gjithë ata që donin të bashkëpunim për të mirën e qytetarëve. Ata e kanë derën e hapur”, u shpreh Berisha. Ndërsa tregoi se në protestën e radhës PD do të jetë edhe më e bashkuar, pasi misioni i saj si opozitë vazhdon.
