Shifra e vjedhur në Bankën e Shqipërisë është 713 mln lekë dhe çdo shumë tjetër është vetëm spekulim mediatik.
Me këtë qëndrim është shfaqur kreu i Bankës së Shqipërisë pas publikimit në media të një raporti të KLSH-së që e çonte shifrën e vjedhur në Bankën Qëndrore në nivelin 21 mln euro. Kreu i Bankës së Shqipërsë ka përshëndetur edhe miratimin me konsensus të reformës në drejtësi, por kërkoi që edhe implementimi i saj të jetë me konsensus, sepse çdo destabilitet do frenonte ekonominë.
Guvernatori i Bankës së Shqipërisë, Gent Sejko, ka deklaruar se nuk ka asnjë të dhënë shtesë dhe asnjë informacion zyrtar se vjedhja në Bankën e Shqipërisë ka qenë më shumë sesa 713 mln lekë, siç ka rezultuar nga auditi i brendshëm dhe është konfirmuar edhe nga FMN.
Shifrat prej 23 mln euro para të vjedhura nga Banka e Shqipërisë, sipas një raporti të publikuar në media këtë të mërkurë, Sejko i ka cilësuar si fantazi e shtypit.
Gent Sejko: Duke iu referuar një numri të madh grupesh pune të brendshme dhe të jashtme, të cilat kanë konfirmuar këtë shifër, shifra rezulton në këtë nivel.Çdo spekulim tjetër mediatik, i cili mund të kërkojë të bëjë lajm, do të prishte imazhin e Bankës së Shqipërisë dhe do të keqinformonte publikun lidhur me shifrën e vjedhur në Bankën e Shqipërisë.
Kreu i Bankës së Shqipërsë ka përshëndetur edhe miratimin me konsensus të reformës në drejtësi, që sipas tij do të ketë impakt të drejtpërdrejtë në uljen e kredive të këqija.
Por thirrja e Sejkos, ishte për implementimin me konsensus të reformës, pasi çdo destabilitet do të frenonte ekonominë.
Gent Sejko: Parimisht, çdo destabilizim politik në teori, do të kishte ndikimin e tij në nivelin e rritjes ekonomike. Në rastin konkret, ne kemi parë që reforma në drejtësi pati një miratim me konsensus, si asnjëherë, me 140 vota. Ky ishte një sinjal shumë pozitiv për Shqipërinë në përgjithësi, për integrimin e Shqipërisë, por dhe për ekonominë shqiptare.
