Edmond Panariti, Ministri i Bujqësisë, Zhvillimit Rural dhe Administrimit të Ujërave, është nisur për një vizitë zyrtare në Shtetet e Bashkuara të Amerikës.
Pjesë e axhendës së ministrit do të jenë një sërë takimesh të rëndësishme në Departamentin Amerikan të Shtetit, Departamentin e Bujqësisë, Kongresin Amerikan, në Administratën e Ushqimit dhe të Barnave (FDA) si dhe në Bankën Botërore. Gjithashtu, Panariti do të takohet me përfaqësues të kompanive amerikane të interesuara për të investuar në bujqësi si dhe me personalitete të komunitetit hebre. Vizita në Muzeumin e Holokaustit në Uashington është gjithashtu pjesë e këtyre takimeve.
Në qendër të bisedimeve do të jenë forcimi i marrëdhënieve tregtare midis dy vendeve, mundësia e financimit për pajisjen e laboratorëve rajonalë me teknologjinë bashkëkohore për kryerjen e analizave, asistenca dhe mbështetja amerikane në implementimin e një projekti-pilot për krijimin e bursës së prodhimeve bujqësore dhe hartimi i një strategjie parandaluese për peshkimin e paligjshëm.
