Nga Arben Llalla
Këshilltari i kryeministrit Cipras, Andonis Markopulos ia arriti të ngrejë një stuhi në gotë gjatë pjesëmarrjes së tij në Kongresin e PBDNJ-së.
Është e para herë në historinë moderne të politikës shqiptare që një kryetar partie me një farë përfaqësimi në Kuvend si Vangjel Dule nuk arrin të mbushë dot as sallën e Kongresit. Dalloheshin qartë vendet bosh në sallën e Katedrales së Kishës Orthodokse në Tiranë, ku zhvilloi punimet ky forum i lartë. Po kështu, përfundimisht një nga forcat politike e themeluar në vigjilje të pluralizmit shqiptar si mbrojtëse e të drejtave të njeriut, tashmë falët këtij Kongresi konsiderohet një forcë ekstremiste separatiste. Në këtë Kongres u vendos që PBDNJ është një parti e ekstremit grek, ku baza shqiptare, nga e cila u ngrit Vasil Melo ka vdekur.
Se çfarë ngjau në Kongres u mësua shumë pak. Doli që Dulen e votuan kundër nja tetë delegatë dhe këshilltari Markopulos shpalosi idetë shoviniste për shqiptarët e Çamërisë.
Gjuha e drunjtë e Markopulos nuk e shqetësoi kryeministrin Rama dhe e bëri me nerva me vonesë Partinë Demokratike, sepse Edi Paloka e qepi gojën, kur dëgjonte bëmat e këshilltarit të Cipras.
Ky i fundit arriti të tërheqë vëmendjen, jo se tha ndonjë të vërtetë, por sepse përdori metodat e propagandës naziste të stilit Goebbels.
Megjithatë si shihet dhe në fotot që po botojmë në 27.al dallohet shumë dashuria e këshilluesit në fjalë për kafshët, i cili duket ecën me parimin “sa më shumë i njoh njerëzit, aq më tepër e dua dacin tim”. Njihet botërisht veprimtaria animaliste e Marlopulosit në mbrotje të kafshëve, madje dhe të atyre që i vranë njerëzit si kafshë.
