Policia nis hetimin pasuror për gjyqtarin Arjan Aliaj, i cili pezulloi nga detyra drejtorin e Policisë së Shtetit, Haki Çako dhe caktoi masën e sigurisë arrest shtëpie për zyrtarët Artion Duka dhe Entjon Xhelilaj.
Gjyqtari Aliaj po verifikohet për veprat penale të “Mosdeklarim të pasurisë”, “Fshehjes së të ardhurave”, “Evazion fiskal”, “Pastrim parash” dhe “Korrupsion”.
Burime nga policia bëjnë me dije se po hetohet mënyra e kalimit të pronësisë së banesës së tij pasi fillimisht ka qenë e të vëllait, më pas e motrës e tani e gruas së gjyqtarit. Këto veprime kanë ngjallur dyshime.
Hetimet janë përqendruar në kontratën e shitjes së vilës, me çmimin prej 10 milionë lekësh të vjetra, dhe në faktin se motra e gjyqtarit, Etleva Galanxhi, ka deklaruar jo atësinë e vërtetë, por e ka ndryshuar atë, nga Çerçiz në Çezar.
Etleva Galanxhi është bashkëshortja e Gilbert Galanxhit, deri para pak kohësh shef i Kabinetit të Prokurorit të Përgjithshëm, Adriatik Llalla.
Hetimi i nisur kryesisht, vjen në një kohë kur gjyqtari Arjan Aliaj është akuzuar nga ministri i Brendshëm, Saimir Tahiri se ka liruar vrasës, përdhunues dhe kriminelë.
